<strong>ဟဲလို ____ပူဂျားစကားပြောနေပါတယ်ရှင့်”</strong> <strong> ဖုန်းမြည်သံကြားလို့ ကိုင်လျက်သား ဖြစ်တဲ့အခါ ဒီ အဖြေစကားနဲ့ ထူးရတယ်။</strong> <strong> ဖုန်းခေါ်သူ အများစုက ပုရိသ တွေဖြစ်ပြီး တစ်ဖက်မှာတော့ ပူဂျား ဆိုတဲ့ နတ်ပျိုမယ်လေးက လက်ခံ စကားပြောရတယ်။</strong> <strong> ဒါဟာ Friendship call center အခန်းထောင့်တစ်နေရာရဲ့ ဇာတ်ဝင်ခန်းလေး။ </strong> <div class="code-block code-block-1"></div> <strong>ပြောရရင် ပူဂျား ဆိုတာက ဖုန်းနံပါတ်တစ်ခုပိုင်ရှင်။ ပူဂျားကလည်း အသံချိုသာတယ်။ ချွဲတယ်။</strong> <strong> များသော အားဖြင့် စကားလက်ခံပြောဖူးသူ တိုင်း ကြွေတဲ့ သူပေါ့။ </strong> <strong>အစကတော့ ပူဂျားနေရာမှာ ကောင်မလေးတစ်ယောက်က လက်ခံစကားပြောတယ်။</strong> <strong> ဒါပေမဲ့ တစ်နေ့မှာ အဲ့ကောင်မလေးက ရုံးမလာဘူး ။ အဲ့မှာ ဖုန်းဆက်သူတွေ နဲ့ ပွဲပေါ့ ။ </strong> <strong>ဖြစ်ချင်တော့ ကရမ် ဆိုတဲ့ ငနဲလေးက အဲ့ ရုံးကို မယောင်မလည် အလုပ်လာလျှောက်တယ်။ အစကတော့ အလုပ်ဘယ်ရမလဲ။</strong> <strong> ဒါပေမဲ့ ဒီနေ့ခန့်စရာဆိုလို့ နေရာတစ်ခုပဲရှိတယ်။ အဲ့ဒါက လွတ်နေတဲ့ ပူဂျားနေရာ။ ဒါဟာ ဇာတ်အိမ်စတည်မှုနဲ့ ကရမ်ရဲ့ စွန့်စားခန်းပါပဲ။ </strong> <strong>ကရမ် ဆိုတာ ငယ်ငယ်ကတည်းက မိန်းကလေး အသံတု လုပ်တာ အောင်မြင်သူ။ ဒီတော့ ပူဂျား နေရာမှာ သူအလုပ်ရခဲ့တယ်။</strong> <strong> ဒါပေမဲ့ ယောကျ်ားလေးက ပူဂျားအဖြစ်နဲ့ ပြန်ကြူ နေရတာ လွဲချော်မှုတစ်ရပ်ပဲ မဟုတ်လား ။ </strong> <strong>သို့ပင် ကိုငှက် သီချင်းထဲကလို ” လွဲလွဲလေးလည်း ကောင်းပါတယ် ” ဆိုသလိုမျိုးပေါ့။ </strong> <strong>ကရမ် အတွက်တော့ ပူဂျားနေရာမှာ တော်တော် အဆင်ပြေတယ်။ </strong> <strong>ကြူ တဲ့ ငနဲတွေကလည်း များလာပြီး အသံပိုင်ရှင် ပူဂျား ကို စွဲလမ်းလာမိတယ်။ </strong> <strong>ဒီမှာ ကမောက်ကမ တွေနဲ့ ဟာသ ဇာတ်အိမ်ဟာ အတည်တကျ တည်ဆောက်ပြနိုင်ခဲ့ပါတယ်။</strong> <strong> အမြင် _____ </strong> <strong>ကျွန်တော့်အနေနဲ့ တော့ ဒီကားရဲ့ ဟာသကို ွနှစ်သက်မိပါတယ်။ </strong> <strong>အောက်လုံးဟာသတွေ မဆန်ဘဲ ရိုးရိုးယဉ်ယဉ် တည်ဆောက်ပြသွားတာကလည်း အရင်ကြည့်ဖူးတဲ့ Grand mastini တို့ထက်သာပါတယ်။</strong> <strong> နောက်ပြီး ကရမ်အဖြစ်ရော ပူဂျား အဖြစ်ရော အသံနှစ်မျိုး လေ့ကျင့်နေရရှာတဲ့ မင်းသားသရုပ်ဆောင်ပုံကလည်း မိုက်ပါတယ်။</strong> <strong> အခြားဇာတ်ဆောင်တွေကလည်း သူ့ role နဲ့ သူ အံဝင်မိပါတယ်။</strong> <strong> ဒိုင်ယာလော့ တွေကလည်း အတင်းရယ်ခိုင်းနေတာ မဟုတ်သည့်တိုင် ပြုံးလျက်သား ဖြစ်မိသွားစေပါတယ်။</strong> <strong> ဒါပေမဲ့ ဆရာဦအောင်သင်း ပြောခဲ့သလို ရယ်မောရတယ် ဆိုတာ ရယ်ပြီးရင် မောရမယ်တဲ့ ။ မဟုတ်ဘူးလေ။ </strong> <strong>ဟာသကားကြည့်ရတာ မောစရာ ရှိသလားလို့ မေးလာကြည့်ရတဲ့အခါ ကျွန်တော် တို့ရဲ့ ဘဝ အလွဲတချို့ဟာ မောစရာ မဆုံးနိုင်တာတွေ ရှိတတ်ကြပါတယ်။</strong> <strong> ဒီအကြောင်းကိုလည်း ဒါရိုက်တာက ပါးနပ်လှတဲ့ ဒိုင်ယာလော့ အချို့နဲ့ တွေးတောစေခဲ့ပါတယ်။ </strong> <strong>ကျွန်တော် တို့ ပြန်စဉ်းစား ကြည့်ရအောင်။ ” ကြူ ရုံလောက်နဲ့ ပူဂျားဆီ ဖုန်းဆက်ဖို့ လိုခဲ့လို့လား ” ဆိုပြီး။ </strong> <strong>အဖြေကိုတော့ ကိုယ်စီအသိနဲ့ပေါ့ဗျာ။ </strong> <strong>ဘဝရဲ့ ညက နက်လာပြီ။ ကျွန်တော် လည်း အထီးကျန်ဆန်လှပြီ။</strong> <strong> ” ကဲ —-ပူဂျား ဆီ ဖုန်းဆက်ကြည့်ရအောင် “</strong> Credit: CM
